రిలీజ్‌కు ముందే ‘హ్యాపీ జర్నీ’ స్పెషల్ షోలు!

ఏడుగురు మహిళల ప్రధాన పాత్రల్లో తెరకెక్కిన ట్రావెల్ డ్రామా చిత్రం 'హ్యాపీ జర్నీ' ముందస్తు వీక్షణకు సిద్ధమైంది. ఈ సినిమాకు సంబంధించిన ప్రత్యేక షోలను మేకర్స్ అధికారికంగా ప్రకటించారు. సెప్టెంబర్ 18న ప్రపంచవ్యాప్తంగా థియేటర్లలో విడుదల కానున్న ఈ చిత్రాన్ని, మూడు రోజుల ముందే అంటే సెప్టెంబర్ 15న ప్రేక్షకులకు చూపించనున్నారు. మంచి టాక్ మరియు వర్డ్ ఆఫ్ మౌత్ సాధించడమే లక్ష్యంగా చిత్రబృందం ఈ ప్లాన్ చేసింది. హ్యాపీ జర్నీ ప్రత్యేక షోలలో భాగంగా హైదరాబాద్‌లోని AMB సినిమాస్‌లో సెప్టెంబర్ 15న సాయంత్రం 7:40 గంటలకు షో ప్రదర్శితం కానుంది. అలాగే విశాఖపట్నంలోని AAA సినిమాస్‌లో అదే రోజు సాయంత్రం 7:30 గంటలకు ప్రత్యేక షో ఏర్పాటు చేశారు. ఈ రెండు ప్రధాన నగరాలతో పాటు మరిన్ని ప్రాంతాల్లో కూడా స్పెషల్ షోలను త్వరలోనే ప్రకటించనున్నట్లు నిర్మాతలు వెల్లడించారు. ఈ చిత్రంతో అభిరామ్ నాయుడు దర్శకుడిగా పరిచయం అవుతున్నారు. గుట్ట ప్రొడక్షన్స్ మరియు కమలాకర్ ఫిలిం కార్పొరేషన్ పతాకాలపై బాలాజీ గుట్ట, కౌశిక్ రెడ్డి సంయుక్తంగా ఈ చిత్రాన్ని నిర్మించారు. పారిస్ మరియు యూరప్ నేపధ్యంలో ఈ సినిమా కథ సాగుతుంది. 'కొన్ని ప్రయాణాలు ప్లాన్స్ మారుస్తాయి... కొన్ని జీవితాలను మారుస్తాయి' అనే ట్యాగ్‌లైన్‌తో ఈ చిత్రం రూపొందింది. ఈ సినిమాలో అన్నపూర్ణమ్మ, ఆమని, యాంకర్ ఝాన్సీ, పాయల్ రాధాకృష్ణ, జినిషా అలీశెట్టి, రూపా శ్రీనివాస్ మరియు సునైనా కీలక పాత్రలలో నటించారు. వీరితో పాటు పృథ్వి దండమూడి, వంశీ, రవి శివ తేజ పైలా సహాయ పాత్రలు పోషించారు. ఈ చిత్రానికి శేఖర్ చంద్ర సంగీతం అందించగా, మణికందన్ సుబ్రమణియన్ ఛాయాగ్రహణం నిర్వహించారు. ఛోటా కే ప్రసాద్ ఎడిటర్‌గా బాధ్యతలు నిర్వర్తించారు. ఏడుగురు మహిళల భావోద్వేగ ప్రయాణంగా రూపుదిద్దుకున్న హ్యాపీ జర్నీ సినిమా సెప్టెంబర్ 18న థియేటర్లలో విడుదల కానుంది.