Pandu Master Injured in Visakhapatnam Road Accident: విశాఖపట్నం జిల్లాలోని ఆనందపురం సమీపంలో రోడ్డు ప్రమాదం జరిగింది. ఆగి ఉన్న కారును వెనక నుంచి వచ్చిన బొలెరో వాహనం ఢీకొట్టింది. ఈ ప్రమాదంలో టాలీవుడ్ ప్రముఖ డాన్స్ మాస్టర్ పండు తీవ్రంగా గాయపడ్డాడు. అతడి రెండు కాళ్లకు తీవ్ర గాయాలు అయ్యాయి. అర్ధరాత్రి ఒంటిగంట దాటిన తర్వాత ఈ ప్రమాదం చోటుచేసుకుంది. ఈ ఘటన స్థానికంగా కలకలం రేపింది. డాన్స్ మాస్టర్ పండు మంగళవారం తగరపువలస సమీపంలో ఓ జాతరలో డ్యాన్స్ ఈవెంట్కు హాజరయ్యాడు. ఈవెంట్ ముగిసిన తర్వాత మాస్టర్ పండు తన బృందంతో కలిసి కారులో తిరిగి హైదరాబాద్ వస్తున్నాడు. ఆనందపురం సమీపంలో ఉండగా.. కారులో ఉన్న ఓ డ్యాన్సర్కు అస్వస్థత ఏర్పడి వాంతులు అయ్యాయి. దాంతో రోడ్డు పక్కన కారును ఆపారు. ఈ సమయంలో వెనుక నుంచి వేగంగా కోళ్ల లోడుతో వచ్చిన బొలెరో వాహనం కారును ఢీకొట్టింది. ఈ ప్రమాదంలో డాన్స్ మాస్టర్ పండు తీవ్రంగా గాయపడ్డాడు. వెంటనే అతడిని విశాఖపట్నంలోని ఓ ప్రైవేట్ ఆసుపత్రికి తరలించి చికిత్స అందించారు. పండు మాస్టర్తో పాటు కారులో ప్రయాణిస్తున్న మరికొందరు కూడా ఈ ప్రమాదంలో గాయపడినట్లు సమాచారం. గాయపడిన వారికి వైద్య చికిత్స అందిస్తున్నారు. ఈ ప్రమాదానికి సంబంధించిన పూర్తి వివరాలు ఇంకా తెలియాల్సి ఉంది. సమాచారం అందుకున్న పోలీసులు ఘటనాస్థలానికి చేరుకుని పరిశీలించారు. ఈ ఘటనపై పోలీసులు కేసు నమోదు చేసి దర్యాప్తు చేపట్టారు.