రోడ్డుపై రూ. వంద నోట్లు విసిరి.. పోలీసులపై కాల్పులు.. సినీ రేంజ్ లో ఛేజింగ్

ఇంటర్నెట్‌డెస్క్‌: మెరుపు వేగంతో దూసుకెళ్లే కారు. దాని వెనకే పోలీసుల ఛేజింగ్‌. వారిని దారి మళ్లించేందుకు రూ.100 నోట్లు గాల్లోకి ఎగురవేసిన నిందితులు. ఈ మధ్యలో పోలీసులపై కాల్పులు. ఇదేదో సినిమా సన్నివేశం కాదు.. పోలీసులు డ్రగ్‌ స్మగ్లర్లను పట్టుకునేందుకు చేసిన ప్రయత్నంలో భాగంగా కనిపించిన దృశ్యాలు. ఉత్తర్‌ప్రదేశ్‌ (Uttar Pradesh)లోని సోనిభద్ర జిల్లాలో ఇటీవల అర్ధరాత్రి ఈ ఘటన చోటుచేసుకుంది. ఇక్కడి హైవేపై పోలీసులు వాహనాల తనిఖీలు నిర్వహిస్తుండగా.. అటుగా వచ్చిన ఓ కారు సిగ్నల్స్‌ను పట్టించుకోకుండా వేగంగా వెళ్లిపోయింది. దీంతో అధికారులు కారును పట్టుకునేందుకు ఛేజింగ్‌ ప్రారంభించారు. నిందితులు తమ వాహనంతో పోలీసుల కారును పదే పదే ఢీకొట్టడంతో అది ఆగిపోయింది. వెంటనే అక్కడే ఉన్న ప్రదీప్‌ కుమార్‌ అనే వ్యక్తి తన కారును పోలీసులకు ఇవ్వడంతో.. నిందితులను వెంబడించడం కొనసాగించారు. పోలీసుల దృష్టిని మళ్లించేందుకు నిందితులు తెలివిగా.. కారులోంచి రోడ్డు పైకి రూ.100 నోట్లను విసిరారు. చివరికి స్మగ్లర్ల వాహనాన్ని పోలీసులు చుట్టుమట్టారు. ఈ క్రమంలో నిందితులు కాల్పులు జరపగా.. పోలీసులు ఎదురుకాల్పులు జరపాల్సి వచ్చింది. ఈ ఘటనలో లుధియానాకు చెందిన ప్రిన్స్‌కు గాయాలయ్యాయి. పోలీసులు అతడిని అరెస్టు చేశారు. మరొక నిందితుడు పరారవగా.. అతడి కోసం గాలిస్తున్నారు. నిందితుల కారును తనిఖీ చేయగా అందులో ఉన్న 3 కిలోల నల్ల మందు, 225 కిలోల గసగసాల పొట్టుతో పాటు రూ.50,000 నగదును పోలీసులు స్వాధీనం చేసుకున్నారు. పట్టుబడిన సరకు విలువ దాదాపు రూ.49 లక్షల వరకు ఉంటుందని అంచనా వేశారు. అనంతరం ఆ కారును సీజ్‌ చేశారు. నిందితుడిని విచారించగా ఝార్ఖండ్‌ నుంచి పంజాబ్‌కు డ్రగ్స్‌ రవాణా చేస్తున్నట్లు అంగీకరించాడు. గతంలోను పలుమార్లు డ్రగ్స్‌ రవాణా చేసినట్లు తెలిపాడు. గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు. For digital advertisements Contact : 040 - 23318181 eMail: marketing@eenadu.in © 1999 - 2026 Ushodaya Enterprises Pvt.Ltd,All rights reserved. Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted. This website follows the DNPA Code of Ethics.