లాస్ ఏంజెల్స్‌లో న్యూస్ హెలికాప్టర్ కూలి ముగ్గురు మృతి

అమెరికాలోని లాస్ ఏంజెల్స్‌లో ఘోర న్యూస్ హెలికాప్టర్ ప్రమాదం జరిగింది. ఎన్‌బీసీ లాస్ ఏంజెల్స్‌కు చెందిన న్యూస్‌చాపర్-4 హెలికాప్టర్ చాట్స్‌వర్త్ ప్రాంతంలో కూలిపోయి మంటల్లో చిక్కుకుంది. ఈ ప్రమాదంలో ముగ్గురు మృతి చెందగా, మరొకరిని ఆస్పత్రికి తరలించారు. మరో ప్రమాదాన్ని గగనతలం నుంచి కవర్ చేస్తున్న సమయంలోనే న్యూస్ హెలికాప్టర్ ఒక్కసారిగా నియంత్రణ కోల్పోయి కూలిపోయింది. మంగళవారం సాయంత్రం 6:57 గంటల సమయంలో మేసన్ అవెన్యూ ప్రాంతంలో ఈ ఘటన జరిగింది. వాణిజ్య భవనాల మధ్య ఉన్న పార్కింగ్ ప్రాంతంలో హెలికాప్టర్ కూలింది. దీంతో అక్కడున్న 4 వాహనాలు, 2 స్టోరేజ్ కంటైనర్లకు మంటలు వ్యాపించాయి. సమాచారం అందుకున్న వెంటనే 50 మందికి పైగా అగ్నిమాపక సిబ్బంది అక్కడికి చేరుకుని మంటలను అదుపులోకి తీసుకొచ్చారు. ఈ ప్రమాదంలో హెలికాప్టర్‌లో ఉన్న ఇద్దరు సిబ్బందితో పాటు భూమిపై ఉన్న ఒక పాదచారి మృతి చెందినట్లు లాస్ ఏంజెల్స్ ఫైర్ డిపార్ట్‌మెంట్ తెలిపింది. హెలికాప్టర్‌లో ఉన్నవారిని ఎయిరియల్ రిపోర్టర్ ఎలియానా మోరెనో, పైలట్ జార్జ్ మార్సినివ్‌గా గుర్తించారు. వీరిద్దరూ ఏంజెల్ సిటీ ఎయిర్ సంస్థ ఉద్యోగులు. ఎలియానా మోరెనో ఎన్‌బీసీ4, టెలిముండో 52 కోసం ఎయిరియల్ కవరేజ్ అందించేవారు. పైలట్ జార్జ్ మార్సినివ్‌కు 14,000 గంటలకు పైగా ఫ్లైట్ అనుభవం ఉంది. విధుల్లో భాగంగా మరో ప్రమాదాన్ని కవర్ చేస్తున్న సమయంలోనే వీరు ప్రయాణిస్తున్న న్యూస్‌చాపర్-4 కూలిపోయింది. అంతకుముందు సాయంత్రం 5 గంటల సమయంలో నార్డ్‌హాఫ్ స్ట్రీట్, డి సోటో అవెన్యూ జంక్షన్‌లో ఎస్‌యూవీ, మెట్రో బస్సు ఢీకొన్నాయి. ఆ ప్రమాదంలో ముగ్గురు మృతి చెందగా, మరో 6 మంది గాయపడ్డారు. ఈ ఘటనను కవర్ చేసేందుకు అనేక మీడియా హెలికాప్టర్లు ఆ ప్రాంతానికి చేరుకున్నాయి. న్యూస్‌చాపర్-4 కూడా అదే ప్రమాదాన్ని గగనతలం నుంచి కవర్ చేస్తోంది. ఈ సమయంలో హెలికాప్టర్ అకస్మాత్తుగా నియంత్రణ కోల్పోయి కూలిపోయింది. ప్రత్యక్ష ప్రసారంలో హెలికాప్టర్ అలారమ్‌లు మోగడం, ఆ తర్వాత ఒక్కసారిగా ఎత్తు తగ్గడం కనిపించింది. కొద్దిసేపటికే హెలికాప్టర్ పార్కింగ్ ప్రాంతంలో కూలిపోయి మంటల్లో చిక్కుకుంది. ఎన్‌బీసీ4, టెలిముండో 52 ఈ ఘటనపై ఉమ్మడి ప్రకటన విడుదల చేశాయి. తమ వార్తా కవరేజ్‌కు ఉపయోగించే హెలికాప్టర్ ప్రమాదానికి గురికావడం తీవ్ర విషాదాన్ని కలిగించిందని పేర్కొన్నాయి. మృతుల కుటుంబాలు, స్నేహితులు, సహచరులకు సానుభూతి తెలిపాయి. లాస్ ఏంజెల్స్ మేయర్ కరెన్ బాస్, కాలిఫోర్నియా గవర్నర్ గావిన్ న్యూసమ్ కూడా మృతుల కుటుంబాలకు సానుభూతి తెలిపారు. లాస్ ఏంజెల్స్ న్యూస్ హెలికాప్టర్ ప్రమాదానికి కారణం ఏంటన్నది ఇంకా తేలాల్సి ఉంది. నేషనల్ ట్రాన్స్‌పోర్టేషన్ సేఫ్టీ బోర్డు, ఫెడరల్ ఏవియేషన్ అడ్మినిస్ట్రేషన్ దర్యాప్తు చేపట్టనున్నాయి. NTSB ఇన్వెస్టిగేటర్ బుధవారం ఉదయం ప్రమాద స్థలానికి చేరుకోనున్నారు. ఒకే ప్రాంతంలో కొద్ది గంటల వ్యవధిలో జరిగిన 2 ప్రమాదాల్లో మొత్తం 6 మంది ప్రాణాలు కోల్పోవడం చాట్స్‌వర్త్ ప్రాంతంలో తీవ్ర విషాదాన్ని మిగిల్చింది.