రివ్యూ: పంచనామా(OTT)

వెబ్ సిరీస్ పేరు: పంచనామా (Panchanama) ప్రధాన పాత్ర (హీరో): భరత్ (సీఐ జైరామ్ / జై) ముఖ్య తారాగణం: మేథా రెడ్డి (ధరణి), శివాజీ రాజా, సూర్య శ్రీనివాస్ (హరి), రూపలక్ష్మి (డాక్టర్ పుష్పవతి) రచయిత / స్క్రీన్‌ప్లే: మోహన్ శ్రీవత్స ఛాయాగ్రహణం: శ్రీకాంత్ పట్నాయక్ నిర్మాత: యాంకర్ ఉదయభాను (ప్రథమ నిర్మాణం) ఓటీటీ ప్లాట్‌ఫామ్: ZEE5 (జీ5) స్ట్రీమింగ్ తేదీ: సెప్టెంబర్ 11, 2026 భాష: తెలుగు (తమిళ సిరీస్ Regai ఆధారంగా రూపొందించిన అడాప్టేషన్) ఎపిసోడ్ల సంఖ్య: 6 ఎపిసోడ్లు (ఒక్కోటి దాదాపు 20–25 నిమిషాలు) సివిల్స్ పరీక్షలకు సిద్ధమవుతున్న యువకుడు ఆది, తాను ఉంటున్న హాస్టల్ గదిలోనే అనుమానాస్పద స్థితిలో ప్రాణాలు కోల్పోతాడు. పోలీసులు ప్రాథమిక విచారణ తర్వాత దీనిని ఒక సాధారణ మరణంగా భావించి కేసును మూసివేసే ప్రయత్నం చేస్తారు. అయితే, ఆది సొంత అన్నయ్య జైరామ్ (భరత్) ఒక పోలీస్ ఇన్స్‌పెక్టర్ (సీఐ). తమ్ముడి చావు వెనుక ఏదో బలమైన కుట్ర ఉందనే అనుమానంతో జైరామ్ సొంతంగా విచారణ ప్రారంభరిస్తాడు. ఆ క్రమంలో ఆదిది సహజ మరణం కాదని, పక్కా ప్రణాళికతో జరిగిన హత్య అని స్పష్టమవుతుంది. ఈ కేసు విచారణ ముందుకు సాగుతున్న కొద్దీ నెమ్మదిగా దిగ్భ్రాంతికరమైన విషయాలు బయటకు వస్తాయి. ఆది చనిపోయిన రోజే మరో ముగ్గురు వ్యక్తులు వేర్వేరు ప్రాంతాల్లో మరణిస్తారు. విచిత్రం ఏమిటంటే, ఈ నాలుగు మరణాలు జరిగిన ప్రదేశాల్లో ఒకే రకమైన వేలిముద్రలు (ఫింగర్ ప్రింట్స్) లభిస్తాయి. కానీ హంతకుడు ఎలాంటి ఆధారాలు వదలకుండా అత్యంత తెలివిగా ఈ నేరాలకు పాల్పడతాడు. అనుమానితులుగా భావించిన వ్యక్తులు జైరామ్ కళ్ల ముందే ఒక్కొక్కరుగా పడిపోతుంటారు. మరోవైపు, చిన్నతనంలోనే తల్లిదండ్రులను కోల్పోయిన జైరామ్‌ను అతని అక్క దేవకి ఎంతో ప్రేమగా పెంచుతుంది. దేవకి అకాల మరణానికి, ఆమె భర్త హరి (సూర్య శ్రీనివాస్)కి ఉన్న సంబంధం ఏమిటనేది జైరామ్‌ను నిరంతరం వేధిస్తుంటుంది. అదే సమయంలో జైరామ్ ప్రేమించిన ధరణి (మేథా రెడ్డి) అనే వైద్యురాలిని డాక్టర్ పుష్పవతి (రూపలక్ష్మి) అనే మహిళ అకస్మాత్తుగా కిడ్నాప్ చేస్తుంది. సామాన్యులపై నిబంధనలకు విరుద్ధంగా జరిగే మెడికల్ ట్రయల్స్, ఆర్గాన్ ట్రాఫికింగ్, ఫార్మా కంపెనీల మాఫియా ఈ అంశాలన్నీ జైరామ్ విచారణలో ప్రధాన సవాళ్లుగా మారతాయి. చివరికి జైరామ్ ఈ హత్యాకాండ వెనుక ఉన్న అసలు సూత్రధారిని పట్టుకోగలిగాడా లేదా అనేది ఈ ‘పంచనామా’ సిరీస్ ప్రధాన కథ. తెలుగు ఓటీటీ స్పేస్‌లో ఇన్వెస్టిగేటివ్ క్రైమ్ థ్రిల్లర్లకు ఎప్పుడూ మంచి ఆదరణ ఉంటుంది. ఒక హత్య, దాని వెనుక ఉండే మర్మం, ఆధారాలు వెతుక్కుంటూ వెళ్లే పోలీస్ ఆఫీసర్ ఈ తరహా కథలు ప్రేక్షకులలో సహజంగానే కొంత ఆసక్తిని కలిగిస్తాయి.ప్రసిద్ధ యాంకర్ ఉదయభాను నిర్మించిన మొదటి వెబ్ సిరీస్ కావడం, 'ప్రేమిస్తే' ఫేమ్ భరత్ ఇందులో హీరోగా నటించడంతో ఈ సిరీస్‌పై కొంత ఉత్సుకత ఏర్పడింది. ఆరు ఎపిసోడ్లుగా, తక్కువ నిడివితో వచ్చిన ఈ సిరీస్ ప్రేక్షకులను ఎంతవరకు ఆకట్టుకుందో చూద్దాం. సిరీస్ ప్రారంభమే చాలా నేరుగా, ఎలాంటి సమయం వృథా చేయకుండా తమ్ముడి మరణంతో మొదలవుతుంది. మొదటి రెండు ఎపిసోడ్లు విచారణ వేగంగా సాగడం వల్ల ప్రేక్షకుడికి తదుపరి ఏం జరుగుతుందనే కుతూహలాన్ని కలిగిస్తాయి. ఒకే రోజు జరిగిన వేర్వేరు మరణాల వెనుక ఒకే రకమైన వేలిముద్రలు లభించడం, సీఐ జైరామ్ పాత్ర ఆధారాలను విశ్లేషించే తీరు విచారణ శైలికి మంచి హుక్ ఇస్తాయి. ఫ్లాష్‌బ్యాక్ సన్నివేశాలను, ప్రస్తుత ఇన్వెస్టిగేషన్‌ను మార్చి మార్చి చూపే స్క్రీన్‌ప్లే పద్ధతి కూడా ప్రారంభంలో బాగానే పనిచేసింది.