Indian-origin pilot| ఇంటర్నెట్డెస్క్: అప్పటివరకు వివాహ వేడుకలో సంతోషంగా గడిపిన ఓ భారత సంతతి కుటుంబంలో ఒక్కసారిగా తీవ్ర విషాదం చోటుచేసుకుంది. పెళ్లయిన కొన్నిగంటలకే వరుడు హెలికాప్టర్ ప్రమాదంలో ప్రాణాలు కోల్పోయారు. అమెరికాలోని జార్జియాలో ఈ ఘటన చోటుచేసుకుంది. డెల్టా ఎయిర్లైన్స్లో పైలట్ అయిన డేవ్ ఫిజీ (25) (Dave Fiji) అట్లాంటాలో నివసిస్తున్నారు. కొన్నేళ్ల క్రితమే అతడి తల్లిదండ్రులు కేరళలోని ఎర్నాకుళం నుంచి అమెరికాకు వలస వెళ్లారు. మే 29న జార్జియాలోని డాసన్ విలె ప్రాంతంలో డేవ్ ఫిజీకి.. జెస్నితో వివాహం జరిగింది. ఆమెది కూడా కేరళ మూలాలున్న కుటుంబమే. ఇరు కుటుంబాలు ఈ పెళ్లిలో సంతోషంగా గడిపాయి. వివాహ వేడుకల అనంతరం రాత్రి 10 గంటల సమయంలో డాసన్విలెలోని వేదిక నుంచి వధూవరులు హెలికాప్టర్లో బయల్దేరారు. వారు అట్లాంటాలోని ఒక హోటల్కు వెళ్లాల్సి ఉంది. కానీ ప్రతికూల వాతావరణం కారణంగా టేకాఫ్ అయిన కొద్దిసేపటికే పర్వత ప్రాంతంలో ఈ హెలికాప్టర్ కూలిపోయింది. ఈ ఘటనలో డేవ్తో పాటు పైలట్ చనిపోయారు. సహాయక సిబ్బంది వచ్చేవరకు శిథిలాల కింద జెస్ని చిక్కుకుపోయారు. ప్రాణాలతో బయటపడిన ఆమె.. ప్రస్తుతం చికిత్స పొందుతున్నారు. వాతావరణం అనుకూలంగా లేదని, ఇప్పుడు ప్రయాణించనని డేవ్ మొదట చెప్పినట్లు ఆయన తండ్రి జార్జ్ ఫిజీ వెల్లడించారు. ఎక్కువ ఎత్తులో వెళ్దామని నిర్ణయించుకొని హెలికాప్టర్లో బయల్దేరినట్లు చెప్పారు. డేవ్ మృతితో జెస్ని షాక్లోకి వెళ్లిపోయిందని ఉద్వేగానికి గురయ్యారు. ఈ ఘటనకు సంబంధించి ప్రాథమిక నివేదిక 30 రోజుల్లో వస్తుందని సంబంధిత అధికారులు వెల్లడించారు. గమనిక: ఈనాడు.నెట్లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త
